ПЕДАГОГИКАЛЫҚ КЕҢЕС – САПАЛЫ БІЛІМ МЕН ЖҮЙЕЛІ ДАМУДЫҢ МАҢЫЗДЫ АЛАҢЫ

Ө.Жолдасбеков  атындағы  №9 ІТ лицейінде  педагогикалық кеңестің кезекті отырысы ұйымдастырылып, білім беру сапасын арттыруға бағытталған өзекті мәселелер жан-жақты қарастырылды. Кеңес жұмысы нақты деректер мен талдауларға негізделіп, баяндамашылардың мазмұнды есептері арқылы толық ашылды.

 Күн тәртібіндегі алғашқы мәселе – «Болашақ көшбасшылар – бүгінгі жетістіктер» тақырыбында лицей оқушыларының жалпы жетістіктері туралы баяндама жасалып, Ж.И.Сеитова оқушылардың олимпиадалар, байқаулар және ғылыми жобалардағы жетістіктерін саралап, дарынды оқушылармен жұмысты жүйелі жалғастырудың маңыздылығына тоқталды.

 Келесі мәселе бойынша Ж.И. Сеитова лицей мұғалімдерінің кәсіби өсу жетістіктеріне мониторинг жүргізіп, педагогтердің біліктілігін арттыру курстары, семинарлар мен кәсіби байқауларға қатысу белсенділігін арттыру қажеттігін атап өтті.

 Үшінші мәселе аясында Ж.И. Сеитова педагогтердің аттестациядан өтуі туралы жалпы есеп ұсынып, мұғалімдердің кәсіби деңгейін арттыру бағытындағы жұмыстарды жетілдіру қажеттігін жеткізді.

 Төртінші мәселе бойынша оқу мотивациясының төмендеу себептері мен оны арттыру жолдары кеңінен талқыланды. Ә.Б. Бектаева және Л.Е.Пузанкова білім алушылардың қызығушылығын арттыруға бағытталған тиімді педагогикалық әдіс-тәсілдер мен заманауи білім беру технологияларын қолдану қажеттігін нақты мысалдармен түсіндірді.

 Бесінші мәселе бойынша ІІІ тоқсан қорытындысындағы білім сапасының нәтижелері сараланып, Б.С. Донаева және Д.И. Наушабаева оқу үлгерімін арттыруға бағытталған қосымша жұмыстарды (жеке жұмыс, консультациялар, ата-анамен байланыс) күшейту қажеттігін атап өтті.

 Педагогикалық кеңес қаулысы негізінде:  Дарынды оқушылармен жұмысты жүйелі түрде жалғастыру;

 Мұғалімдердің кәсіби дамуын үздіксіз жетілдіру;

 Аттестациядан сапалы өтуге әдістемелік қолдау көрсету;

 Оқу мотивациясын арттырудың тиімді жолдарын енгізу;

 Білім сапасын көтеру мақсатында кешенді жұмыстарды күшейту міндеттері айқындалды.

 Кеңес қорытындысы лицей ұжымының ортақ мақсатқа бағытталған бірлігін көрсетіп, сапалы білім мен саналы тәрбиені қамтамасыз етудегі жауапкершілігін айқындады. Әрбір қабылданған шешім – білім сапасын жаңа деңгейге көтеруге бағытталған нақты қадам.