“НАУРЫЗ БАЗАРЫ” АТТЫ МЕРЕКЕЛІК ЖӘРМЕҢКЕ

Наурыз мейрамы – халқымыздың ғасырлар бойы жалғасып келе жатқан ең ізгі дәстүрлерінің бірі, береке мен бірліктің, жаңару мен жақсылықтың символы. Осы ұлық мерекеге орай Ө.Жолдасбеков атындағы №9 IT лицейінде «Наурыз базары» атты мерекелік жәрмеңке ұйымдастырылып, жоғары деңгейде өткізілді.

Іс-шара мектеп ауласында өткізіліп, оған лицей оқушылары мен ұстаздар қауымы белсене қатысты. Жәрмеңкенің басты ерекшелігі – 7-сынып оқушыларының сатушы ретінде қатысып, өздерінің дайындаған өнімдерін ұсынуы болды. Оқушылар өз үстелдерінде ұлттық нақышта безендірілген түрлі ұлттық тағамдар, үйде дайындалған тәттілер мен нан өнімдерін, сондай-ақ тақырыптық қолөнер бұйымдары мен кәдесыйларды көпшілік назарына ұсынды.

Жәрмеңке барысында оқушылар тек сауда жасап қана қоймай, еңбекқорлық, жауапкершілік, ұйымшылдық, қарым-қатынас мәдениеті және кәсіпкерлік дағдыларын тәжірибе арқылы меңгерді. Әрбір сынып өздерінің шығармашылық қабілеттерін көрсетіп, үстелдерін ерекше сәндеп, ұлттық дәстүр мен мәдениеттің көрінісін айшықтай білді.

Іс-шараның мазмұндық құндылығы – оқушылардың бойында ұлттық құндылықтарға құрмет, еңбекті бағалау, бірлік пен ынтымақтастықты сезіну сияқты қасиеттерді қалыптастыруға бағытталуында. Сонымен қатар, бұл жәрмеңке жас ұрпақтың қаржылық сауаттылығын арттырып, кәсіпкерлікке деген қызығушылығын оятуға ықпал етті.

Мерекелік шара барысында мектеп ауласында көтеріңкі көңіл-күй орнап, оқушылар мен ұстаздар Наурыз мейрамының шынайы рухын бірге сезінді. Әсем безендірілген жәрмеңке сөрелері, ұлттық тағамдардың молдығы мен оқушылардың белсенділігі мерекенің ажарын аша түсті.

Осындай тәрбиелік маңызы зор іс-шаралар арқылы лицей қабырғасында білім алып жатқан жас ұрпақ ұлттық мәдениетті қадірлейтін, еңбекқор, белсенді әрі шығармашыл тұлға болып қалыптасып келеді.

 «Наурыз базары» – береке мен бірліктің, еңбектің қадірін түсіндіретін тағылымы мол мерекелік шара ретінде лицей өмірінде ерекше орын алды.