27
сәуір
2026
ТӘРБИЕ САҒАТЫ
Ө.Жолдасбеков атындағы №9 IT лицейінде ағымдағы жылдың 2 мамыр күні «1 мамыр – Қазақстан халықтарының бірлігі күні» тақырыбында тәрбие сағаты өткізілді.
Тәрбие сағатының мақсаты – оқушыларға еліміздегі ұлттар мен ұлыстар арасындағы татулық пен бірліктің маңызын түсіндіру, достық пен сыйластыққа тәрбиелеу болды. Сабақ барысында білім алушылар Қазақстандағы түрлі этностардың мәдениеті мен дәстүрлері туралы айтып, бірлік пен бейбітшіліктің құндылығын терең ұғынды.
Аптаның дәйексөзі:«Білікті білім жинап кәсіп етер, білімнің дәмін татып өсіп-өнер»
Бұл нақыл сөз арқылы оқушыларға білімнің адам өміріндегі рөлі мен оның болашақ табыстың негізі екені түсіндірілді.
Қауіпсіздік тақырыптары бойынша да маңызды ақпараттар берілді:
1–4 сыныптарда «Жасанды интеллект мүмкіндіктері. Ата-аналардың дауыстарымен қоңырау шалу» тақырыбы қарастырылып, балаларға заманауи технологиялардың мүмкіндіктерімен қатар, алаяқтықтың жаңа түрлерінен сақтану жолдары түсіндірілді.
5–8 сынып оқушыларына «Бейтаныс адамның шақыруынан қалай сенімді және қауіпсіз бас тартуға болады?» тақырыбында түсіндірме жұмыстары жүргізіліп, күмәнді жағдайларда дұрыс шешім қабылдау дағдылары қалыптастырылды.
9–11 сыныптарда «Зорлық-зомбылықтан қорғану: оның әдістерін және көмекке жүгіну қағидаларын білу» тақырыбы талқыланып, оқушыларға өз құқықтарын қорғау, қауіп төнген жағдайда тиісті орындарға жүгіну жолдары үйретілді.
Тәрбие сағаты жоғары деңгейде ұйымдастырылып, оқушылардың белсенді қатысуымен өтті. Мұндай іс-шаралар жас ұрпақтың елжандылық қасиеттерін арттырып, қауіпсіздік мәдениетін қалыптастыруға ықпал етеді.