ҚҰҚЫҚТЫҚ САНА – ЖАУАПКЕРШІЛІК НЕГІЗІ

Шымкент қаласы білім басқармасына қарасты Ө.Жолдасбеков атындағы №9 ІТ лицейінде «Заң және тәртіп» жобасы аясында жоспарға сәйкес 2026 жылдың 11 сәуір күні 9–10 сынып оқушыларына арналған «Құқықтық білім: балалардың құқықтары мен міндеттері» тақырыбында мазмұнды әрі тағылымы мол сабақ ұйымдастырылды.

Аталған сабақты құқықтық сауаттылықты арттыру мақсатында Ергеш Батыр Шақшанбайұлы жүргізіп, оқушыларға қазіргі қоғамдағы заңның маңыздылығы, әр азаматтың құқықтары мен міндеттері, сондай-ақ құқықтық мәдениетті қалыптастырудың негізгі бағыттары жөнінде кеңінен түсіндірді.

Сабақ барысында Қазақстан Республикасының Конституциясында бекітілген балалардың негізгі құқықтары, олардың қауіпсіздігі мен қорғалуы, білім алу, еркін пікір білдіру құқықтары нақты мысалдар арқылы талқыланды. Сонымен қатар, құқықпен қатар жүретін міндеттер – тәртіп сақтау, үлкенге құрмет, қоғам алдындағы жауапкершілік сияқты құндылықтар да тереңінен қозғалды.

Оқушылар өз ойларын ашық білдіріп, түрлі жағдаяттарды талдау арқылы құқықтық тұрғыда шешім қабылдауды үйренді. Интерактивті сұрақ-жауап, пікір алмасу форматында өткен сабақ жасөспірімдердің құқықтық сауаттылығын арттырып қана қоймай, олардың азаматтық ұстанымын қалыптастыруға ықпал етті.

 Бұл іс-шараның басты мақсаты – өскелең ұрпақтың құқықтық мәдениетін қалыптастырып, заңға құрметпен қарауға тәрбиелеу, сондай-ақ әрбір оқушының өз құқықтары мен міндеттерін терең түсінуіне бағыт беру болды.

 Құқықты білу – өзіңді қорғау,

ал міндетті орындау – қоғамға қосқан үлес!